Os axentes que
veñen de sancionar a unha rapaza en Carballiño logo de ser bicada mentres
conducía expoñen como causa: "por manter relacións amigables". Eu,
que fun árbitro de fútbol e balonmán ou membro de anpas e conselos escolares,
sei que nas actas só se deben recoller feitos. E dicir: empirismo puro e desprovisto
de xuízos de valor: "o número oito do equipo local deulle unha hostia nos
fuciños ao número sete dos visitantes logo de que este marcase un gol e se
baixara os pantalóns ata a altura dous nocellos deixando ao descuberto o cú
cara á bancada norte, reservada aos siareiros do equipo local". Nas actas
non hai lugar para as suposicións. Nin tan sequera para os artificios da
linguaxe ou a literatura creativa. Os gardas de Carballiño extralimitáronse,
pois na acta só era pertinente dicir: "...por recibir un bico en (parte da
anatomía) de parte do seu acompañante", especificando se a condutora
perdera a visión da estrada un intre.
Porque hai bicos
e bicos. No mundo da mafia un ósculo podia sinalar o obxetivo das balas. Xudas
vendiu a Xesús cun bico. Pero, aínda admitindo que o bico de Carballiño fora
dado para propiciar o achegamento sentimental, cumpre recoñecer que non distrae
o mesmo o bico apaixonado e cargadiño de feromonas dos adoescentes que o bico
sosegado da parella madurada por longos anos de convivencia táctil, olfactiva e
intelectiva.
Quero supor que a
sanción do Carballiño responde á necesidade de chamar a atención sobre a absoluta
conveniencia de manter o foco na condución para evitar accidentes na estrada.
Pero nise punto sería aínda máis importante que non recibir un bico a erradicación
da fumata de tabaco -xa non digo de porros ou cousas máis fortes-, ou do
costume dalgúns de ir comendo, ou mirando papeis, ou pendentes do whats app,
mentres se circula máis ben mal.
Home, tamen
estaría ben evitar as felacións e outros exercicios de quencemento, pois nise
punto lembro que un condutor dun BMW potente perdera o control do automobil por
esa causa na AP 9 con resultado nefasto para a parella.
Ao fin, trátase
dunha cuestión de puro sentidiño común, para que non circule, a xeito de mofa, o
chiste consabido nestes días no Carballiño:
- Damián, por que non me bicas como fan
tódalas parellas?
- Xa, pero non as da Garda Civil
Alfred Eisenstaedt. Bico roubado
No hay comentarios:
Publicar un comentario