O xuízo contra o xeneral golpista e
sanguinario Ríos Montt, responsable de ter masacrado ao campesiñado
guatemalteco hai trinta anos, será un proceso non xa contra a súa
persoa. El, como outros altos cargos do exército moven a
conmiseración polo estado de saúde precario, propio dunha edade
avanzada que sin embargo non lle impediu participar na política ate
hai ben pouco. Son escasas as causas abertas no sumario tendo en
conta o volume das súas razzias no rural, asasinando a homes, pero,
sobre todo, a mulleres nenos e anciáns para sementar o terror e,
seguindo directrices da Casa Blanca, disuadir á poboación de
calqueira tentación de achegamento a teses marxistas. ¡!. O tópico
e lugar común de tódolos movementos de opresión e aniquilación
sistemática encarnados polos Laocontes do Cono Sur desde Videla a
Pinochett, desde Sanguinetti a Ríos Montt, e que precisaron do
afloramento de movementos de resistencia popular articulados
necesariamente como guerrilleiros, polo desequilibrio de forzas, e
agora, por fortuna, reencarnados na autoafirmación de: identidade,
independencia de facto e liberdade do movemento bolivariano,
resistencia da revolución Cubana fronte ao imperialismo,
autoafirmación do ser indíxena, unión de intereses comúns dos
mercados das economías emerxentes, nacionalización das fontes de
riqueza fronte á expoliación extranxeira... O golpismo en
Latinoamérica foi sempre alimentado polos intereses económicos e
xeoestratéxicos dos yanquis. Ríos Montt foi un dos últimos
monigotes sanguinarios dispostos a masacrar aos seus compatriotas por
catro cadelas e por manterse no poder. E ben curioso que nestes días
a meirande parte das Axencias e a opinión pública falen de
aperturismo na Igrexa coa elección dun xerarca que se levaba ben co
réxime de Videla, cando en Guatemala, Nicaragua, El Salvador tiñan
para elexir curas e bispos que axudaban á poboación civil a escapar
das violacións, torturas e asasinatos.
Pero claro, o papa Francisco asombra
aos prosélitos pola súa sinxeleza: ¡Non tiña nin coche, ía a pe
á basílica, a rezar, e tiña carné de socio do San Lourenzo!. Se
ademáis de eses méritos, que ben certo é que non todo o mundo pode
chegar a acadar, carjara areón na carroseta de cando en ves ía
saber o que era bó.
(FRAGMENTO DA NOVELA “CARTAS A
ELISA”. © Santiago Casal Quintáns)
No país sobrevivía un enorme grao de
corrupción e o exército seguía a aproveitar o pretexto de combater
a insurxencia para actuar como mercenarios ó servizo de intereses
capitalistas. Cunha clase media de peso ben pequeno e unha
desvertebración insalvable entre ela e o campesiñado indíxena só
a presión política internacional podía inxectar algún ar de
transformación democrática e transparencia nunha acción de Goberno
que herdaba intereses desprezables da cúpula dos poderes. Só
esperaba que o meu órdago non fose demasiado estudado polo
Comandante e que a inxenua referencia ás miñas intencións
mediáticas alentasen polo menos a súa curiosidade. Rumiando esas e
outras consideracións, dirixinme ao encontro co cónsul de España
en Guatemala.
Pasaran case que trece anos desde a queima da embaixada
española e a matanza perpetrada polos militares contra o grupo de
indíxenas que, xunto con estudantes, ocuparan a sede demandando o
cesamento da represión e o respecto dos dereitos humanos. A
situación do campesiñado era de total indefensión fronte ás
incursións sanguinarias e a espoliación sistemática das súas
terras. Eu tiña moi fresco todo aquilo. Cando ocorreron os feitos
era delegado nunha plataforma estudantil e manifestarámonos en apoio
do movemento indíxena e en solidariedade tamén cos estudantes que
participaran na ocupación pacífica da embaixada. Entre os mortos
estaba o pai de Rigoberta Menchú, loitadora a prol dos dereitos do
seu pobo, a quen viñan de concederlle o Nobel da Paz xusto antes da
miña viaxe para levarme a Laura.
Mentres subía a escalinata da
Embaixada, sede de todo o corpo diplomático, recordei que o cónsul
e outros dous cidadáns españois tamén perderan a vida pola
actuación represiva do exército. De modo que había precedentes
desalentadores en canto á impunidade con que actuaba o goberno. En
resposta a todo o sucedido, España retirara ó seu embaixador
durante catro anos. Pero o tempo pasara, e coa celebración de
eleccións democráticas, aínda superando os intentos de golpes
militares, o país atopábase inmerso nun período de transición
cara a un Estado de dereito, coa loita contra a corrupción, a paz
social e a defensa dos dereitos humanos como obxectivos primordiais
por alcanzar. A pesar da presión internacional, o poder executivo
era aínda leve na defensa deses principios. O país atopábase aínda
afundido na miseria, o analfabetismo, a violencia e a ausencia de
asistencia social. O descontento da poboación era patente.
Laura
sabía ben todo iso cando se embarcou na misión cooperante. O
delegado de Médicos sen fronteiras fora claro respecto delo con toda
a expedición. Con todo, as necesidades perentorias de asistencia
sanitaria nun territorio amplo sen cobertura algunha por parte do
Goberno fixeron pasar a un segundo plano os temores a perigos
encubertos pero reais. A actuación mercenaria ao servizo de
intereses de capitais multinacionais seguía a ser unha realidade
teimuda. Pensei entón no carácter desprendido ata da súa propia
vida deses cooperantes que, podendo vivir con todas as comodidades
que coñeceron no seu primeiro mundo, se colocan no gume da navalla e
perseguen a defensa da dignidade dos desherdados, actuando ademais
como verdadeiros escudos humanos. No fondo, tiña envexa deles. Pero
eu nunca podería chegar tan lonxe.
O cónsul, don Anxo Miranda,
recibiume de contado. Fóra de toda formalidade e logo dun abrazo
sentido púxose á miña disposición para canto puidese precisar
durante a miña estadía. Todo ía ben ata que lle falei da miña
visita ó Gobernador Militar e da miña intención de pedirlle
explicacións:
–Xabier, é mellor que deixe nas miñas mans a
obtención de información de parte do Goberno de Guatemala. Ó fin e
ó cabo eu represento aquí os intereses dos cidadáns
españois.
–Como queira. De tódolos xeitos, se me chamase o
Gobernador Militar non sería correcto declinar a invitación.
–Vaino
chamar. Pero aconsellolle que non sexa directo nin lle bote un pulso.
No fondo, neste país aínda falta moito para saír dun estado de
corrupción que ven de moito tempo atrás.
–Fixéronnos crer que a
democracia estaba a instalarse amodo.
–Se cadra montaron unha gran
mascarada. Pero a sombra do Poder económico é alargada. E no seu
nome atropélanse os dereitos máis elementais desde tempos moi
remotos. Fíxese, xa en 1871 o xeneral Xusto Rufino Barrios impulsou
a súa “Reforma Liberal”. No paquete de medidas introduciu o
traballo forzoso para os indíxenas, desposuídos das súas terras. A
forza política e económica que guiaba os designios do país co
nacemento do século XX era a Compañía United Fruit, contando co
apoio do ditador Manuel Estrada Cabrera.
–Pero Cabrera morreu antes
de rematar os seus proxectos.
–Certo. Pero os Estados Unidos de
Norteamérica apoiaron á “Compañía” instalando no Goberno do
país sucesivos monicreques que defenderon os seus intereses
monopolistas, controlando case a metade da terra, o acceso ós portos
e a súa utilización. Aínda hoxe o pobre desenvolvemento viario é
consecuencia daquela situación en que os seus ferrocarrís absorbían
todo o negocio de transporte no país.
–O tío Sam ten intereses
económicos aparte de xeoestratéxicos.
–¡Non me faga falar! Hoxe
é admitida ata por Washington a intervención da CIA financiando e
adestrando ao exército rebelde paramilitar que derrocou a Arbenz.
–O
ideólogo marxista?
–Ese mesmo. Arbenz encarnaba a versión boa do
socialismo que tentaron implantar sucesivos gobernos desde o golpe de
1944 contra a ditadura. Ao principio, as boas intencións e as
reformas atopaban atrancos por mor da mesma corrupción. Pero Arbenz
puxo máis acento na devolución das terras en usufructo aos
campesiños. A CIA interpúxose no seu camiño, contaminou as súas
intencións tachándoas de Stalinistas, sementou o enfrontamento
clasista e empuxou ó exilio ao home que podería ter devolto a
esperanza a este pobo.
–Que foi del?
–Rematou a súa aventura
vital suicidándose. Desde entón sucedéronse, nun pulso continuo,
golpes ditatoriais e aperturas a solucións máis democráticas
dentro dun escenario de corrupción e de control das liberdades civís
dentro duns límites estreitos.
–E en que punto nos atopamos
agora?
–Hai un descontento xeral con este Goberno. Séguense a
atropelar os dereitos humanos. O pobo indíxena padece a violencia
paramilitar. Pero o que é máis importante é que a burguesía
guatemalteca está máis preparada, máis informada e máis farta
tamén. Demanda un Estado de Dereito no que a súa voz e os seus
intereses estean realmente representados. Habemos de aproveitar o
momento e mobilizar á diplomacia para que os EE.UU. non se
interpoñan nos cambios que se intúen. Pouco a pouco e con
intelixencia, Xabier.
–Grazas por estes minutos, Sr. Miranda. Non
quero restarlle máis do seu impagable tempo. Tereino informado se o
Gobernador me recibe.
–Grazas, e cóidese.
No hay comentarios:
Publicar un comentario