Los centinelas del mar

Os gurús da crítica literaria, a situación económica, a retracción do mercado e, ao fin, unha análise pormenorizada de todo o que se publica en España ao longo do ano insisten na tese de que unha porcentaxe que pode estimarse no corenta por cento dos títulos son aportes prescindibles. Non só porque o universo de lectores potenciais compón a mesma foto fixa desde os anos oitenta, senón e sobre todo porque os filtros sobre a calidade do que se publica non teñen potencia e obxectividade dabondo. En España edítanse cincuenta e cinco mil libros novos cada ano, os mesmos que en Alemaña, que duplica a nosa poboación, e varios miles máis que en Francia ou Italia.

Considerando todo isto a aparición nas librerías do país e de todo o Estado da última entrega do prestixioso fotógrafo coa dobre nacionalidade, ourensán e viguesa, Guillermo González Vázquez, que leva por título “Los centinelas del mar” supón un reforzado motivo de satisfacción dentro do panorama editorial, pola entidade formal e a fermosura impactante do traballo pero tamén por cumprir esa función de cubrir unha orientación temática pouco tratada.

O traballo fotográfico de Guillermo González nesta publicación e impagable: non só porque fai unha recollida exhaustiva da meirande parte dos faros que salpican a costa desde Donosti a A Guarda, non só porque o fai con perspectivas inéditas, luces que requiren non só dunha técnica depurada senón tamén de sensibilidade extrema e, sobre todo, da paciencia, esa virtude sen a cal moitos dos legados de imaxes máis importantes nunca se terían producido e que leva a Guillermo a agardar, a insistir, a experimentar, reflexionar e sentir, dentro do diálogo aberto entre o fotógrafo e a materia que o impresiona, e no que a técnica é a ferramenta que o propicia.

Esa realidade é teimuda é expresiva para quen ten a sensibilidade de percibila cos seus matices diferenciais, como diferentes son os faros que sinalan as entradas aos portos ou a presenza de enfilacións ou acantilados na liña de costa diversa desde o Miño ate o Bidasoa: Rías Baixas, Costa da Morte, Rías Altas, Cantábrico galego, Asturias, Cantabria, País Basco. Diferencias impostas polo mar pero tamén consecuencia da cultura arquitectónica de cada pobo e da pegada, o selo persoal dos autores das casas da luz que buscaron a integración na paisaxe das súas invencións para facilitar o diálogo coa natureza desde perspectivas singulares.

Recoller nun libro esa singularidade dos faros do norte de España é o encomiable aporte de “Los centinelas del mar”, un libro evocador dun mundo de luces, distancias, naturezas indómitas, soedades militantes... e tamén de testemuñas de sucesos lexendarios e de memorias revividas.

“Los centinelas del Mar”

Edita: Gestión y tratamiento de imagen del Atlántico. VIGO, Decembro 2012.